|
|
29-07-2007, 05:50 PM
|
#1 |
|
©~®§][©][قـ مميز ـلم ][©][§®~©
 
|
بعض قصائد الاستاذ هاشم صديق
طبقات ود ضيف الله ياكمسارى دى حافلة وين؟؟ دى ماشة الشعبى اركب واسرع نفر .. ونقوم ياولد جنيت؟؟ وكمان بتكورك وبالحقلوم وتقول الشعبى؟.! ......... انا ماشى... ماشى الـ.... الـ..... وين ياعم؟؟ لو ماشى الحركة برضو بنمشى بنفس الشارع ياولد انت مسلط؟! حركة وشعبى وفى وشى؟؟ دى خلطة وين؟؟ انا عندى قلب ماتوقف قلبى طيب يا عم وين ماشى ؟؟ اسرع اقول انا ماشى .... ما شى .... يا ربى لوين ياود جاد الله؟؟! نسيت يا زول طيب يا عم خلينا ننادى ( يصيح) تيجاني الماحي تيجااانى الماااحى باقي نفر نفر ... وسفر سفر .. و.. نفر يوماااتى ليلاااتى صباااحى نفر... وسفر لا ياولدى كورك وقول: جوع .. وسهر حفر .. مطر .. غم .. وكدر فلس فى شهر طشاش فى نظر عمر..وهدر طيب يا عم ما انت العاقل ورينا الناس اللاقو الراحة لقوها فى وين؟؟ كفر..ووتر؟؟ لا لا تبيع لى روحك تخون لجروحك وتختا الشر تعوم فى البر تكون نص حاجة وتصبح واحد تكون كضباب ونجمك صاعد تكون سراق لا ضمير لا شاهد تكون ود موية او حربوية وزمنك واعد يا عم مالك؟؟ مرات مجنون مرات عاقل مرات خايف مرات راجل حتجننى ... انت منو ؟؟ انا ولد جاد الله فى كل محطة فى كل مظلة ...... كورك يا وليد تيجانى الماحى باقى نفر تيجااانى المااحى نفر..وسفر تيجانى الماحى يوماااتى صباحى ليلااتى نفر... وسفر جوع... وسهر حفر...ومطر طشاش فى نظر عمر وهدر .... (2) الحيشان يا ايدى شيلينى ختينى فى البيت الشعب تلات حيشان فى نص القلب هنا المسرح هنا التلفاز هنا الرادى هنا امدرمان هنا السودان ........... اتحزمت كتبت نضمت انتجت عديل بالغت ماقصرت نصحنى الغاشى والدانى.. منو القال ليك دة بيت الشعب فى نص القلب؟؟ دة بيت السلطة يالسطى كلو بديع هنا بينزاح بايد ضباح كلو بديع مصيرو صريع ويكون فانى ............ اتفلسفت خطبت اتقعرت ما خليت حرف عربى ما خليت مثال غالى... رفعت الصوت كبير عالى لما الصوت عديل بح واتحذلقت بالفصحى _ بيان هام يا اهل الفن دعونى اضع ( طوبة ) على صرح البناء العام فهذا الشعب مجبول على الافعال لا ا لاحلام هذا الصرح صرح الشعب لا السلطة هنا الفنان ملك الناس فهو الحادى و ( الاسطى ) تعالوا يا بنى وطنى وبا لابداع لا الاحلام نوكد ان.... ..... فجاة سمعت صوت فرقع تحت كرعيا زى ألغام ونص ألراس وقع شاكوش دفن برشام عصار وقيامة قول لا حول ياود جاد اللة مافى كلام .......... قلت دراما شان الشعب سمعت هتاف مكرب تب _ لا للفجرة بل اسلام ........ _ لا بالعالى وبالقسم الغالى لود جاد اللة بل دين اللة ..... _ مافى دراما الا ( عقال) وجبال وجمال وسيوف ودفوف وخيل ولجام ............ يا ود جاد اللة اطلع برة وشيل الطوبة ما دايرين لو جبت الطوب فى ( كماين سوبا ) ..................... _ نحنا ولاد الصرح الخاص لو حتى قعدنا تحت راكوبة ما دايرين للصرح العام _ يا ود جاد اللة انت شيوعى..... وبعثى عراقى ومرات ( الصحوة ) والاسلام.... ..... _ ما دارين فى دراما خلاعة امراة سافرة فى بيت زوجية او صبحية اوحتى مسافرة ولابسة بلوزة بدون اكمام ............. _ ممنوع افلام لنعامة بتجرى وريشها قصير عاريات كرعينها طــــــويــــــــــــلـــــــــــــة ( سيكسى) (1) دة تبذل عام ............. ياود جاد اللة اطلع برة ان شاء اللة تهاجر تمشى لكندا او تمشى تموت فى لغم فى الشام ............. يا ود جاد اللة امرق برة ما دايرين الحاد وحرام .. ................. ................ طلعت مرقت تانى خطبت ؟؟؟؟ اتفلسفت؟؟؟ اتفاصحت لقت نفسى الوم روحى ليل وصباح _ يا ود جاد اللة بدل ما قلت بى هوبة تضع طوبة على صرح البناء العام وبا لافعال وما الاحلام ايا مسكين يقع شاكوش فى نص الراس دفن وبرشام .............. يا ود جاد اللة تطلع برة صالح عام مليون عام؟؟؟ (3) الثورة حزنك قصرك مالك وجعك عر بيتك حزمة ملكك ذمة تاجك عمة رفيقك ناى ........ تموت بى نارك وتدى الناس من ثمر اوتارك هواك مجانى ( عدادك) ساى (4) المانشيت بورولوج تف من خشمك الحنضل هداك برقا شرق اجمل لافى جريدة لاسيرة لا رادى لا وادى ولاغزلوهو فى معمل داك برقا طلع من سالبك الموجب ومن ضحكة بكاك تبتب وفى صنة سكون غنبنك وقف تاتا وعديل كركب ومن جبل الحزن حجاك وساق دمعك بحر ساساق دفربى عشقو للمركب وكان الدنيا كل ماتضيق تلاقى صديق تلاقى طريق صعب اسهل.... تف من خشمك الحنضل هداك برقا بلج اجمل ............. لو ماكنت سودانى ولو ماجرحك الصابر سراح حدادى مدادى من شرقك ولى غربك ومن عقلك ولى قلبك شنو الخلى الوطن بى حالو مليون ميل تشيلو عديل ويتمهل فى ضيق صدرك لو ماكنت من وجعك شرب حرفك وماقبل على الاسهل شنو الخلى العيون تحمل عذاب الرؤيا للاجمل.. ولو ما كنت ناى سواى وماحداث وسر ضحاك ومابكاى شنو النحتك من الاهوال فى احسن حال بقيت سودانى با لازميل وبالتجريح وبالتجريج وبالتنكيل وما باللفة ولاسهل شنو البقاكا ياهلكان من السودان شنو السواكا نار وعصار ودار وعمار وانت وحيد كمان اعزل تف من خشمك الحنضل داك برقا شلع اجمل رغم (الظاهرة) والخافية رغم العصبة والمافيا رغم الشفتو والجاكا وناس ( دلاكة) كنداكة. ناس (ودوك) وجبناكا ناس الزانة والزازاى ناس الزانة ناس (البزة) والتاتاى ناس (المزة) سيرة الناس فى ضل البن وبو الشاى ناس (البيع) وستين وش _ عشان الخش ومليون راى ............... الا حجاكا ما بكمل تجى الكنداكا تمشى وراكا تلقى الستاتر الناصر طويل امهل وما اهمل تعاين والعصار حاسر ويلوح ليكا يوم باكر تتق من خشمك الحنضل تشوف برقا سطح اجمل ............ لو ما كنت سودانى ولو ماكنت سودانى ولو ماحرجك الصابر سرح حدادى مدادى شنو الخلى الوطن بى حالو مليون ميل تشيلو عديل ويتهمل فى ضيق صدرك ................... تف من خشمك الـــــــــــحـــــــــــــنـــــــــضــــــــــل |
|
|
29-07-2007, 05:52 PM
|
#2 |
|
©~®§][©][قـ مميز ـلم ][©][§®~©
|
ضلفة البت الرتينه
بورولوج (1) الحصة اتذكرتِك كُت فتران مهدود الجِتّه فجأه لقيتَ أقدامي اتْصابن عيوني انفتحن عِرْفو السكه. كنت مشوّش وعاشق لِكّه بقيت تلميذك عديل أتهجّا واعرف أقرأ كمان اتفاصح طول الحصة (2) التلاشي رفعت مَخدّه في بيتنا لقيت خليتي لي بسمه فَتَحْت عيوني في الذاكره طار بجناحو صوت همسه. فتحت كتاب طلع من وسطو نور بصماتك الخمسة سمعت موسيقى حسيتك تقول تاوقتي لي حسه. (3) شاي الصباح صباحك خير. من إيديكْ أشيل إلفة كبابي الشاي يولع فيني صوت النايْ وأقول ليكْ الغرام جِرْسَه أقول ليك القَلُب بكّاي. ...... ملامحك والصباح والبُن وضحكاتك تدوبي معاي يِبشِّر فوقنا بوخ الشاي وأعاين ليكِ راسي يِزن وقافيه حنينه فيني تَرِن أغيب في الحَضْره واتلبّش واخاف من جني بيكِ أجن. (4) الفيضان أقول ليكْ الكلام الجد هواك جوايا فاض بالجد أخير ياروحي نفتح سد. (5) البذره حكايتي معاك حكاية البذره والمطره كِبِر إحساسنا باللُقيا صِبِح يا روحي ضُل شجره. (6) التهاني كل عام وانتي طيبه وبت مَسَرّه. ......... كل عام وانتي صابره جروحها حُره ........ كل عام انتي عارْفه الحاله مُره إلا ضحكك «ساكْس» يزغرد ألف مره (7) التوجس الشوق برد ولاّ الحنين نام في الصباح؟! عندي إحساس إني مارق من عيونكِ وإنو شيتاً كان يناغم ليّا فيكي زي تقول غَمّض وراح ....... وين أقَبِّل لما أمرق من ونستك والسلام؟! ....... أمشي وين وجوه وتراً بيكْ يدندن وقايلو نام؟! ......... خوفي يوم ألقاكِ خاصمتي المسام. ( النشيد يابِتْ يا رتينه ايديك في إيدَيْ حُمِى وربّابه. حضورك «طار» فُقَرا وتُقابه. بقراك في السر بقراك في الجهر واكتب ليكْ سطرين في سحابه. علمتي الحُزُن يتهجّا الفرحه. الشمس الزازت غار السكه اتماصت وطارت رجعت ركّت فوق أغصانك شايله دوايه سبحه وآيه بالّه محايه راسمه كتابه في صفقة غابه محفّله صندل وين ما تْقَبِّل. فاتحه عيون المطره الجايه تَرُش النار في صحن الدار الشَبّ حرابه للفُقَرا تَفُرشي البِرش الأسمر وتطوي بساط الساده الأحمر. تَقِلْبي الصفحه دُعاش في لمحه صوابعي تفرهد تمحا وتكتب تكتب وتمحا. إشارْة الشارع تَفْتِّح أخضر يأذِّن لينا صباح في اضينّا تترتر راجعه الفاجعه الشينه مراكبْ الرحله تبوس المينا. النيل يتململ يتُف الحنضل يَرجع أجمل ويمشي مهابه. يلوِّح ليهو هتاف الحِلِه ترقص صَفقَه تصفق شتله ويغَنّوا غلابه. يا بت يا رتينه في «سيره» وعَرْضَه غَيّرتي الحركه مشت للبركه. بصمتي بعشره تَخُتي الضحكه محل الكَشَره. تختي النُقطه في نون الشنطه تقولي : - جميل بدل «يا شَرطه» تقولي : - أصيل بدل «يا شطه» تقولي عديل في عين الفيل : - حَنْخُت حِنّتْنَا في قلب الخرطه. ما بْتَنْعس جمره تقوم تتمطّا. ما بسكت ناي بي أمر الشُرطه. ما بترمي جريده غُبار في سِيره ما بنبكي نقول : - يا آهـ من ديل ويموت الحيل. ما بننسى القَمَره نَمُرْق السَهَله نَشِب للمطره ونرمي شليل والرَحْل التايه يلاقي محطه. - يا بت - يا توب بسيمه تَبَقْبِق ضحكه في لمبه. يا لمسه في نسمه ترازي الرمَضَا التَقْلِي الحبه. ..... ونستك ساي جبنه وشاي والصُحبه كبابي. طَلَقْتي بخور يطير فوق سور لي ضُل هبّابي خليتي الدهشه تخاصْم العادي ...... صوابعك دقّت باب البيت انتشت الحله وجاها منادي. خليتي الهاتف يِرِن ويتمحن الصوت يتجنن البحه تجازف تصبح فرحه تَرِن في وادي. ..... نفختي الروح في ضلفه يتيمه بِقَت منشرحه. رَشّيتي الإلفه بلمسه حنينه بكت بالفرحه وتصحصح يومي تدندن عادي. رميتي البذره في رفقه وعِرفه خَلَطِّتي المنقه معاها زبادي. خليتي التوب يقول الروب بي صوت سوداني كتبتي بيان بي صوت و «كمان» غناهو الرادي. (9) الحواشي (أَلِف) ألفين وخمسه لسه ما وِصلت (لميسنا). البشاير بي عيونّا ماها مكياج الإشاعه. أبقى بت فهمِك جروحك. أدِّي عقلك للحواري وما لروحك أَمْلي أنفاسك شجاعه أبْري من بنط الجرايد ومن أناشيد الإذاعه (باء) باقي منك جوه فيني كلك انتي وزايده سُتره ولمبه خضرا وحوش وضلفه. وباقي مني جوه فيكِ روح وجته ونار وسكه وسيف وكَفّه (تاء) تَبّيتِي في الوهطه وجفونك مرسى للقمره النِسَت (أحلام صبانا) يا مسايرك ليلها أصبح. يا ملامحك لونها أفصح من رطانه ..... يا تَخَاكْ من غيمه سمرا لما تَبْتَب فوق سَدُر قَش البُطانه. (ثاء) ثرثرة ومن صوت سكون. شَبَك الحروف في الصمت ما بعني الجنون. حبل الكلام بينّا اتْربط ما ببقى بس باللسان أو حتى بي «لغة العيون». نحنا اكتشفنا الونسه في لغة «التخاطر» في سكون والتواصل في «نكون». (جيم) جابني ليك طيراً خرافي من زمن موجود .. و .. مافي. وما بقيت في الدنيا في وحَبِيت وَقَفْتَ ضحكت تاتيت في المشي إلا لامِن جيتي طالعه صبيه فارعه من غباش غار المنافي. ومشيت هواك مستور ... و ... حافي. (الهوامش) (1) من دفتر البت الرتينه الهوى الهَدْهَد مسادير الغبينه. كان ولسه زمان وهسه السلام الموده والسكينه و ... «ضلفة البِت الرتينه». (التاريخ) أربعه وعشرين ... شهر واحد .....ألفين وخمسه ...... ولسه برضو في الباقي قصه. |
|
|
|
29-07-2007, 05:54 PM
|
#3 |
|
©~®§][©][قـ مميز ـلم ][©][§®~©
|
قرنتـــــــــــــــــــــيــــــــــــــه
قرنتية .. ما غواصة روسية قرنتية لا دبابة برمائية لا جاسوسة مدسوسة .. لا غواصة روسية لا جندية في "حركة" .. لا مختلسة مال شركة لا قصفت حدود "فشَلا" لا كسرت صريف كسلا لا معروفة ختمية . قرنتية لا صعلوقة لبست "شورت" لا بتعرف شنو البظبورت لا محتاجة جنسية . هي قايلة النيل سقِف بيتها وقايلة ضِفافو "محمية" . جات منسابة عز الصيف .. قايلة الناس بِكِرمو الضيف .. وقايلة النيل أمان والقيف وقايلة "الحاضرة" عصرية قرنتية .. جات بصغارها دايرة الخير لا شافت يٍفَط تحذير لا نزحت تكوس توزير لا جاطت حركة السير لا دارت وسام تقدير لا مستلفة عشرين وش ولا بتعرف تعيش بالغش كان محتاجة بس للقش وجات أحلامها دوغرية قرنتية لا بلعت عديل السوق لا نضمت بدون طايوق لا كنزت دهب أو ماس لا ظلمت بدون إحساس لا عصرت شباب الناس لا كتمت على الأنفاس لا قطعت عشم بي فاس لا داستنا زندية قرنتية لا دست سلع في الخيش لا شربت مريسة عيش لا ضبطوها في التفتيش لا خانت قسم أو ديش . لا اجتمعت "بمستر جون" لا أكلت "مؤنة العون" . لا سدّت علينا الكون لا سبت كتاب أو دين لا سامتنا حمرة عين ولا باعتنا ضهرية قرنتية جات مشتاقة للخرطوم تزور أحبابها خايفة اللوم . تصيح وتنادي بالحلقوم : "جنينة النزهة" وين يا زول . "جنينة النزهة" وين يا زول . *** لقت حال الجنينة خلا . حليل زمنها وحليل أهلها لا قرنتية .. لا أصلة لا صوت ككّو .. لا بغلة لا حلوف .. لا أسداً مهاب بالخوف لا نمراً يشد للشوف . لا ضل فيل .. لا تيتل جريهو جميل ولا غزلان .. ولا طاؤوس يباهي النيل لا زفة طيور ونعام لا نمراً دفر قِدّام كل الشُلّة ياقرنتية غمضة عين أحالوهم لصالح عام تقول الدنيا "مهدية" قرنتية .. ؛ جات زي ضيفة ما غارة . لا محتاجة لي فيزا .. ولا تصديق على زيارة . جات والشوق دموع حارة . تجدد في العيون الشوف . بين توتي وعلالي أبروف قايلة الدنيا لسة سلام ما خيم زمان الخوف لسة هناك ضفاف حرة . ما مطمورة للمُرّة قايلة الناس بعزو الضيف ما بسوقوهو لي حفرة وجوار القيف . ما بياكلوهو في الصفرة ومصيرو مخيف قايلة الحاضرة ما غابة . وقايلة حقوقها محمية قرنتية .. لا قدلت في شارع القصر . لا حامت في وكت الحظر لا خشت على المأمور . ولا نطت سلك أو سور لا دخلت على أمد رمان ولا كسرت قفل دكان لا دفرت على التلفاز ولا عضّت كراع فنان لا ذاعت بيان للناس لا احتلت كمان "حيشان" ولا نصبت شبك للحشّ جات بصغراها كايسة القش تلاقي القوت صبح محظور . وخير البقعة جوه السور سماحة الدنيا منسية قرنتية لا بتعرف عجن أو لخ وجات أحلامها دوغرية . عجب .. ساقوها جوه الفخ عجب .. من طولها وقعت تخ عجب .. سلخوها صبحية عجب .. ونحنا بنسلخ الإنسان كيف ما نغدر الحيوان عجب .. والدنيا عصرية قرنتية .. لا دبابة برمائية لا جاسوسة مدسوسة لا غواصة روسية لا جندية في حركة لا مختلسة مال شركة ولا حزبية بعثية قرنتية ! |
|
|
|
06-11-2007, 08:49 PM
|
#4 | |||||||||
|
©~®§][©]قـــ جديدــلم[][©][§®~©
|
رد: بعض قصائد الاستاذ هاشم صديق
|
|||||||||
|
|
|
08-11-2007, 04:04 PM
|
#5 |
|
الفائز السوداني الأصيل الأول
|
رد: بعض قصائد الاستاذ هاشم صديق
تن توون يا غالى تحية وانحناء لاختياراتك المعبرة امتعنا بهاشم صديق دع هذه الانفعلات تنفجر لكل الشعب وباسم الشعب من اجل الشعب ربنا لا يحرمنا منك ومن هؤلاء الذىن يحسون بالشعب لكل كل ودى وتقديرى واجلالى |
|
|
|
16-11-2007, 08:43 PM
|
#6 |
|
©~®§][©][قـــ أساسي ــلم][©][§®~©
 |
رد: بعض قصائد الاستاذ هاشم صديق
حيا الله الأخ تنتون... في الحقيقة أود أن اشكرك على هذا المجهود الرائع والمختارات الرائعة التي زينت هذه المساحة... والتحية للمبدع دوماً الرائع هاشم صديق صاحب القلم الخرافي الجميل. كل الود، |
|
|
|
29-11-2007, 09:03 AM
|
#7 | |||||||||
|
الفائز السوداني الأصيل الأول
|
رد: بعض قصائد الاستاذ هاشم صديق
|
|||||||||
|
|
|
04-09-2008, 02:34 PM
|
#8 |
|
©~®§][©][قــ ساطع ـلم ][©][§®~©
 
|
الرائع الاستاذ هاشم صديق (كلام للحلوه)
بسم الله الرحمن الرحيم السلام عليكم ورحمة الله وبركاته لما شُفتِك ليلِى ضَّو وبَقَّ نور ونرجس الجنه المفرهد رفّ بى جِنحَات عطور وغنَّى فارسِك خَتَّ صورتِك فى الإطار فى الليالى نَجِم يِلالى ونسمه فى وهج النهار وقال فى وَصفِك لما بنتى أحلى مِنِّك . برضُه إنتِى وما فى غيرِك زول معانا حتى كان يا سمحه غِبتى ومَرّه جَالَن الف خَاطِر بى عيون عقلى المسَاهر فجأه عينيكِ الحبيبه قالو سارح وين مِسَافِر؟ عِشتَ قولِن شيل وصَفقَه وقُلت بس يا ريتنى ابقى همسه فى حُلم الأميره أو سَبَايب فى الضفيرة أو عِقيد فى تِبرِ جيدها أو قليب فى راحة ايدها يا زمان أسمعنى واكتب: البَرِيدها وريدها سِيدى وريدِى سِيدَها الزمان لوحتى بالغ ما أظِن فى زول يعيدها. يا حَلاتِك مره همسه .. ومره نَسمَه ومره هَلّت نَجْمه غابت ومره صَحْوَة غمزه نامت ومره ضحكه تَرَضِّى شوقنا ومره كلمه تضِّوى فوقنا ولمّا نسرح فيكِ قَادلَه زى ملايكه علينا نازله بَس نغنى: يا حلاتكُم يا أهَلنَا يا مصابيحنا ونجومنا الضّاويَه فى واحات زَمَنَّا |
|
|
|
08-09-2008, 05:38 PM
|
#9 |
|
©~®§][©][قـــ أساسي ــلم][©][§®~©
|
رد: الرائع الاستاذ هاشم صديق (كلام للحلوه)
سوداني ماجملك وماروعك حقيقى كلمات منسقة جدا ومفردات موضوعة فى محلها الصح تحياتى ليك ولهذا القلم القوى المبدع |
|
|
|
09-09-2008, 09:58 AM
|
#10 |
|
الإدارة العليا
|
رد: الرائع الاستاذ هاشم صديق (كلام للحلوه)
هاشم صديق حاجة فيك تقطع نفس خيل القصايد تشده أجراس المعابد توهتنى .. جننتنى جننت حرف الكلام وبرضو أدتنى السلام *************** حاجة فى شُرف المداين وفى غرف كل السفاين جوّة فى عمق المناجم .. والعيون حاجة زى ماتكون محلـّق فى العواصف فجأة .. تهبط فى السكون حاجة زى نقرالأصابع لمـّا ترتاح .. لى الموسيقى حاجة زى أخبار .. تناغم من جريدة حاجة زى وترالموانى لمـّا يصدح لى سفينة .. حاجة فيك ********* حاجة فيك لا بتبتدى .. لابتنتهى خلتنى أرجع لى القلم وأتحدى بى الحرف الألم وأضحك مع الزمن العريض وأنسف متاريس الطريق وأعرف متين أبقى المطر وأفهم متين أصبح حريق .. حاجة فيك كل ما جاد به هذا الشاعر يستحق التوثيق هنا تحياتي يا sudany.. |
|
|
|
09-09-2008, 01:29 PM
|
#11 |
|
©~®§][©][قــ ساطع ـلم ][©][§®~©
|
رد: الرائع الاستاذ هاشم صديق (كلام للحلوه)
بسم الله الرحمن الرحيم الحمدلله والصلاة والسلام على رسول الله وعلى آله وصحبه أجمعين السلام عليكم ورحمة الله وبركاته اسعدني مروركم وتعقيبكم شـكــ وبارك الله فيكم ـــرا لكم ... لكم مني أجمل تحية . |
|
|
|
17-09-2008, 11:23 AM
|
#12 |
|
الإدارة العليا
|
رد: بعض قصائد الاستاذ هاشم صديق
هل من مزيد يا سوداني؟؟؟ |
|
|
| أدوات الموضوع | |
|
|
المواضيع المتشابهه
|
||||
| الموضوع | كاتب الموضوع | المنتدى | مشاركات | آخر مشاركة |
| قصائد للشاعر عثمان البشرى | عاشق التاكا | إرشيف المنبر الأدبي للمواضيع القديمة | 14 | 04-10-2007 07:10 PM |
| قصائد هندية | سمراء دلوعة | إرشيف سودانيات للمواضيع القديمة | 4 | 23-07-2007 07:53 PM |
| الاستاذ هاشم كرار طريح الفراش | هجو الأقرع | إرشيف المنتديات العامة للمواضيع القديمة . | 7 | 19-06-2007 06:31 AM |
| الي اغلي صديق الرحال | شبط ومشط | بيـــت الكـــــل | 6 | 09-05-2007 10:28 PM |
 |
