بسمــ الله الرحمن الرحيـــــم
السلام عليكم ورحمه الله وبركاته,,
اخوانى واخواتى كيف اخباركم ان شاء الله كويسين_للأسف ماذال هناك كثيرون من يضحكون على الناس لااعرف لماذا! هل لانهم اثرياء؟؟ فلنفترض انهم كذلك!سوف تفارق الدنيا يوما ما وستغلق الارض عليك ابوابها(ابن ادم ستفارق كل ثروتك لن تنفعك بشئ الا التى فعلتا بها خيرا سترافقك حسناتها يابن ادم)! ستندم يوما ما يابن ادم!
عن واثلة بن الأسقع , قال : قال رسول الله صلى الله عليه وسلم : ( لا تُظْهر الشماتة لأخيك فيرحمه الله ويبتليك) رواه الترمذى وقال : حديث حسن , إن دلالات الآيات تدل على صحة معنى الحديث ، يقول تعالى : )إِنَّمَا الْمُؤْمِنُونَ إِخْوَةٌ( , وفى قوله )إِنَّ الَّذِينَ يُحِبُّونَ أَن تَشِيعَ الْفَاحِشَةُ فِي الَّذِينَ آمَنُوا لَهُمْ عَذَابٌ أَلِيمٌ فِي الدُّنْيَا وَالآَخِرَةِ ( .. كما استدل النووى بهاتين الآيتين فى هذا الباب : باب النهى عن إظهار الشماتة بالمسلم ثم ذكر بعد الآيتين هذا الحديث .
ان إظهار الشماته بالمسلم تنافى جملة حقوق الأخوة فى الله المطالبين بها جميعاً فأردت أن لا نحرم من الحديث خيراً .
الشماته : أن تعير أخاك بالذنب أو العمل أو أى حادثة تقع له أو ما شابه ذلك لأنه من الأذى المنهى عنه . ولأن الله قد يعافيه مما هو فيه ثم تقع أنت فيه أو يحل فيك ، فماذا يكون الأمر إذن بل سَل الله العافية والسلامة واحمد الله على عافيته لك ولا تُعَيَّرْ أخاك وكما فى حديث أخر فى صحته نظر أيضاً : من عير أخاه بذنب لن يموت حتى يعمله ، فالأخ الحق لا يحب أن يظهر أى شماتة لأخيه لأنه يحب له الخير ولا يحب إيذاءه ويراعى شعوره وإحساسه ويحمد الله على عفوه له مما حلَّ فى أخيه.
ولكـــــــــــــن!!!
هناك مالفت نظرى _يوجد بعض الناس من يسخرون باخوانهم!! ( اهل العوض) خصوصا اهل النكته والطرفه_نعم هنالك من يروى النكته بقصد الابتسامه فقط لا ليس للسخريه وهنالك العكس تماما. مع انه حصل مثل هذا الموقف من الكوميدى محمد موسى مع احترامى له وانتم تعلمون ذلك وتم الرد له من قبل الشاعر:يوسف الشوبلى الرجل المخضرم له من قلبى الف تحيه.
(انما الاعمال بالنيات)!
وسأعيد أرسال هذه الرساله!
الى:كل من يسخر من(أهل العوض)!
رسالة بليغة من أهل العوض مخصوصة
للناس الظراف اولاد المدن وبالأخص ودموسى
بدور رد السؤال لو باللغة المهموسة
فينا نقيصة ولا الصورة جات معكوسة ؟
جبتا الفتنة تعلن حرب بى جاسوسة
والسبب الفنيلةالقلت في الوسخ مدسوسة
نحن نفوسنا في بحور العفاف مغموسة
مية غمسة لاعار لا دنس لا سوسة
نحنا أهل العوض والعزة ما بنكوسا
أصحاب سمته وأصحاب فرسةً
نحنا أنعامنا بتعاف ترتع المعفوسة
ونحن جدودنا عادي بطيعوا الجاموسة
إيانا أهل العوض أهل النحاس أب رنّة
أهل البَدر ة والمهيوب وأهل الشنّة
أهل عزة وأهل سمتة وعروض ومحنة
ناس البادية ناساً عشرتن تتمنى
نحن أهل العوض حافظين عهود ما خناّ
وللجار و العشير بالشينه ما تعجلنا
بيوتنا مسيد ضيوف زمن العدم ما بخلنا
وما بصح الوليد في أعرافنا يجاهلنا
ونحنا أهل العوض والله لاتقينا ولا تبدلنا
واثبين كالأسود من واجبة ما اتماهنا
في البر في البحرتلقانا وين ما كنّا
في قمم الرجال كذب البمِس لى حصونّا
ونحنا أهل العوض في الحالي و الفات كنا
قج شرك الكلا م في مشينا ما بعطلنا
بس بوعيك أكان دقس في أصولنا ومتجاهلنا
نحسب في الجدود ستين ومن غير إنََّ
ونحنا ربّونا الشياب فوق ماما ماتعجنا
حافظين لسان حافظين كرامة أهلنا
أشبال من أسود في ضبعة ما تهجنا
سايرين سير كرام لامن نلاقي اجلنا
ونحنا ذاتنا يا ود موسي ما بواخذونا بي بنولـِّد
و الـما عندو رأي حقو يتبع ويقلد
لو ما مخـّك المخمود وحسك المتبلد
جامعة موسكو ما جابت دكاترة تولد ! ؟
ما راعيت شعور الناس شعورك فاترة
بتسيء للعزار أهل السيوف الباترة
أَمَانةً تَدخنك شطة ودموعك قاطرة
ما سمعت بالولادة أتخصصولا دكاترة !؟
نحن والله عرب وأولاد عرب لينا الشرف والعز
بنسرح بالرزق نحلب نصـُر ونجز
ويوم الحارة والعركة السلاح برز
ثابتين كالجبال الشامخة ما بنفز
المخسوفة والمرقوعة ياها لباسنا
المجلوبة والمقنية من ميراثنا
الجار والعشير من الكتف لى راسنا
في المال والعروض تخشى الملوك من باسنا
ليه يا ود موسى بتذم الرجال بالعايلة
ما بعشّوا الضيوف تحت السحابة الشايلة ؟
ما سمعت في أم همج كاكوم عقيد الزايلة ؟
ما سمعت بالنمر حرق الخديوي القايلة ؟
لكن لسانك فك يا إبني أصلو مابتستامن
تشحن في النفوس من الغبينة مُداماً
بس سمة المن مثالك في البحر بترامن
العربي إن رقص ألبل قرونن قامن
دحين ياخي رغم الغطرسة بالتمثيل وحبة كاشك
تلقى أصفارنا أكبر من مساحة داشك
شبعانين طحين من الفطير ودراشك
أخير تبعد بخاف من شوكنا يخرب شاشك
ومهما زعمت من عزة ونفخ فشفاشك
أعلم طينّا أنصح من تراب خشخاشك
شوف ليك ناس رخاس تاخد عليهم فاشك
أول غلطة كان تنيتا بنعل خاشك
دحين ياخي اولاد عرب والغير عرب كلهم أخوانك
إحذر واكترث شكل قوافي لسانك
والرمي فوق الجماعة بالتعابير خانك
في نص البحر بتدور تقج صيوانك ! ؟
نحنا نضافنا يا ود موسي مو صابون
نحنا نضافنا فى عروض وشرف مصيون
نحنا نضاف ضراع بالدكري المسنون
طيبين عُشرة ولكن للخصيم طاعون
نحنا سماحنا يا ود موسي مو كريمات ولمعة لون
نحنا ولدنا عاشميق عكس للعرجون
نحنا ناس لينا أعراض بيحكما القانون
سماحة الزول يفرّج كربة الممحون
نحنا دفعنا يا ودموسي ما جركان
ونحنا ما بندفع الجبنة وحليب الكان
ونحنا دفعنا فى النوق أمات سناماً بان
نحنا ضربنا للعوق انفجار بركان
وكان كلمنا يا ود موسي بنقول الكلام حقاني
وكان غنينا بنخت الشعر فى معاني
عزيزين فى النسب من ذلة مابنعاني
نحسب فى الجدود ستين ومن غير عاني
دحين يا غبار الكبرياء المن المعالم حاجب
أحذر منّوا لا ينسيك حقوق الواجب
ومن أمثال تراثنا الفي العرف والواجب
مهما العين تطول مابتعلى فوق الحاجب
وعشان ما نغلط معاك ونشيل النقط من شينك
أوعى تعضعض الناس البوضحوا شينك
هسع وقعت في الحلة ووجب تكشينك
شن ودّاك لشعراء البطانة تشينك
دحين ياخي الطامع في كثيرة الغير قليلتو تضيع
وسيد بيت القزاز ما ببدأ بالجديع
بولاد الحديد القاسي في القطيع
العربي إن حرن وسط المحاص مابطيع
نحن والله لا بنخاف لا بنعاف ولا بنتهدد
لا بنكل ولا بنمل ولا بنتردد
كمان للزول البخون عُشرتنا ما بنتودد
نبقالو البلا في كل فِجَة مَمَدَّد
**لكم منى خالص التحايا**
أهــــل العــــــوض!!
رد: أهــــل العــــــوض!!
